اقبال‌ بولمادی

كوپ‌ ييگيت‌لر گليپ‌ گچدی‌ جهاندان‌
نيتينه‌ گورا اقبال‌ بولمادی‌
گردشی‌ كج‌ قهبه‌ فلك‌ اليندن‌
ارتيری‌ شاد بولان‌ اويلان‌ گولمه‌دی‌

گونده‌ كفن‌ بيچر بو اجل‌ خياط‌
بير بلادير هيچ‌ قوتارماز بو صياد
پله‌ - پله‌ آشاق‌ دوشر آدمزاد
بو گون‌ گوردوگيميز ارتا قالمادی‌

بير دگيش‌ خانه‌ دير دنيانينگ‌ يوزی‌
نصيحتيم‌ اشيت‌ دينگله‌ بو سوزی‌
اجل‌ يتيپ‌ آدم‌ يومولسا گوزی‌
گويا بو ديناگه‌ گلدی‌ گلمه‌دی‌

همايون‌ قورغانين‌ سالديران‌ هارون‌
دنيانی‌ دورت‌ بولن‌ هانی‌ فريدون‌
قيرق‌ شهری‌ قيزيلدان‌ غرق‌ ادن‌ قارون‌
گوزی‌ قومدان‌ دولدی‌ پولدان‌ دولمادی‌

مختومقلی‌ حيران‌ هر يانا باقار
بو نه‌ قدرت‌ ايشدير سوودان‌ اوت‌ چيقار
ياغشی‌ اوغولدان‌ رحمت‌ آريغی‌ آقار
لعنت‌كرده‌ اوغول‌ دوغدی‌ دوغمادی‌
‌